მეგობრებო, ამ თემაში განვიხილავთ მდინარეზე ფიდერით თევზაობის თავისებურებებს. შესავალის სახით შემოგთავაზებთ სტატიას, რომელშიც მოკლედ აღწერილია თუ როგორ უნდა ამოვიცნოთ თევზაობისთვის პერსპექტიული ადგილები მდინარეზე. თარგმანი ადაპრირებულია ჩვენს მკითხველზე.
წარმატებული ადგილის ძებნაში
სათევზაოდ წასულებს შეიძლება იღბალმა უცაბედად გაგვიღიმოს და კარგი ნადავლით დავბრუნდეთ. მაგრამ, ზოგჯერ პირიქითაც ხდება. ასეთ დროს ვამბობთ, რომ ამინდმა არ ივარგა, იყო ქარი, მაღალი ან დაბალი ატმოსფერული წნევა და, რა ვიცი, ათასი მიზეზი არსებობს წარუმატებლობის გასამართლებლად. რატომ ხდება ასე, ნუ თუ მართლაც ასეთი შემთხვევითობაზე დამოკიდებული რამაა ეს თევზაობა. მემგონი ასე არ არის. თქვენ ხომ გინახავთ, რომ ხშირად გვერდიგვერდ მჯდომ მეთევზეებიდან ერთს "უმართლებს" და ის იჭერს, ხოლო მეორეს "არ უმართლებს" და ის ნადავლის გარეშე რჩება. რა ხდება? მათთვის ხომ ამინდიც, ქარის მიმართულებაც, ატმოსფერული წნევაც და ყველაფერი სხვა ერთიდაიგივეა. ერთ-ერთი კარგ ადგილზე ზის - მიპასუხებთ თქვენ და აბსოლუტურად მართალი იქნებით. ფიდერით თევზაობაში განსაკუთრებული მნიშვნელობა აქვს სათევზაო ადგილს. ხოდა, სწორედ ასეთი "იღბლიანი" ადგილების მოძებნაში ან მიზანმიმართულად შექმნაში დაგეხმარებათ ეს სტატია.
სად სეირნობს თევზი მდინარეში?
თუ მხედველობაში არ მივიღებთ წელიწადის ისეთ პერიოდებს, როცა თევზი ასრულებს სეზონურ მიგრაციას და ფაქტიურად მისი მოძრაობა არ არის დამოკიდებული კვებით მოთხოვნილებაზე, მაშინ თევზის გადაადგილების მთავარ მამოძრავებელ ფაქტორად უნდა ჩაითვალოს საკვების ძებნა. შესაბამისად, თევზის თავშეყრის ადგილად შეიძლება ჩაითვალოს ის, სადაც გარკვეული მიზეზების გამო კონცენტრირდება ბუნებრვი საკვები. მინდა გითხრათ, რომ ასეთი ადგილები ბევრი არ არის და უბრალო ანკესით აღჭურვილი მეთევზე იშვიათად პოულობს მათ. მაგრამ, სულ სხვაა ფიდერი.
დიდი ხნის წინ ერთმა მეთევზემ გამანდო მარტივი ჭეშმარიტება - "თავზს უყვარს ჭამა!" მე კი ჩემი მხრიდან დავამატებდი, რომ "თევზს უყვარს ჭამა კომფორტულ პირობებში!" "ვის არ უყვარს?" - იტყვით თქვენ. შესაბამისად, ფიდერის საკვებურისა და დამატებითი საკვების სწორად გამოყენებით ჩვენ შეგვიძლია გემრიერლი "მაგიდა" გაუშალოთ თევზს წყალსატევის ნებისმიერ ადგილას. მაგრამ, თუ ჩვენ გვინდა, რომ თევზმა დიდი რაოდენობით მოიყაროს თავი ჩვენს "სუფრაზე" და თანაც დიდი ხნით დარჩეს იქ, ყოველივე ეს უნდა შევთავაზოთ მას კომფორტულ პირობებში! სწორედ ასეთი ადგილები უნდა ვიპოვოთ ჩვენ და სტაბილური კენკვა გარანტირებულია - შეგვიძლია ახლა გავაკვირვოთ მეზობელი მეთევზეები ჩვენი "იღბლიანობით".
რა არის აუცილებელი?
თავზი მუდმივად ასრულებს კვებით მიგრაციას გარკვეული ზონის ფარგლებში. ეს ზონა შეიძლება ფსკერზე არსებული მხოლოდ ერთი ორმოთი იყოს შემოფარგლული ან განფენილი იყოს რამდენიმე კილომეტრის მანძილზეც. მოკლედ, თევზი იკვებება იქ, სადაც საკვები ბუნებრივად გროვდება და ის ადვილად ხელმისაწვდომია. ასეთი ადგილები მჭიდრო კავშირშია ფსკერის რელიეფთან და შესაბამისად ხშირად არ იცვლიან მდებარეობას. მათ კიდევ თევზის კვებით ბილიკებს უწოდებენ. აი სწორედ ასეთი ბილიკები წარმოადგენენ იმ "კომფორტულ პირობებს“ - სადაც თევზისათვის ყველაზე მოხერხებულია საკვების მიღება.
ამერიკა არ აღმომიჩენია, მაგრამ მემგონი ჩამოვაყალიბე იმის აუცილებლობა, რაზეც შემდეგში უნდა გესაუბროთ.
არემარეს შეფასება
რა ვიცით ჩვენ მდინარეზე? წყლის მასა მიედინება დაქანებულ ზედაპირზე, რომელსაც აბსოლუტურად არაერთგვაროვანი რელიეფი აქვს. შესაბამისად, თევზის კვებითი ბაზაც ფსკერზე არაერთგვაროვნად იქნება განაწილებული და საკვების მაღალი კონცენტრაცია იქნება იქ, სადაც წყალს წინააღმდეგობას უწევენ და მიმართულებას აძლევენ ფსკერის სხვადასხვა ამობურცულობები და ჩაზნექილობები.
თუ მდინარის ჩვენთვის უცხო ნაპირზე აღმოვჩნდებით, ჯერ ვიწყებთ წყლის ზედაპირის ვიზუალურ დათვალიერებას. ეს ნიშნავს იმას, რომ ყოველი ვიზუალურად განსხვავებული ადგილი წყლის ზედაპირზე შეიძლება ჩვენი დაინტერესების ობიექტად იქცეს. მაგალითად, ავიღოთ ჩქერი.
ჩქერი
ის ყოველთვის კარგად არის გამოხატული მდინარის ზედაპირზე და წარმოადგენს წყლის ჩაბრუნების და ჩახვევის ადგილს, რომელიც წარმოქმნის დინების მიმართ პერპენდიკულარულად ან ირიბად მიმართულ ზოლს. ჩქერის მრავალი ნაირსახეობა არსებობს, უნდა შეგვეძლოს მათი ამოცნობა.
ჩახვევას წარმოქმნის წყლის ნაკადი, რომელიც "ჩქერის" ქედიდან ვარდება ქვევით. თევზაობის თვალსაზრისით საინტერესოა არა თავად ჩქერის ქედი, არამედ მის ზემოთ განლაგებული წყლის მონაკვეთი. ასევე საინტერესო ადგილია ნაპირიდან ჩქერისკენ მიმავალი დახრილობა 1-2 მ-დე სიღრმეზე. ჩქერისთვის დამახასიათებელია კიდევ ის, რომ მის ზემოთ ან ქვემოთ თითქმის ყოველთვის არის ორმო. ამიტომ, საზრიანი იქნება, თუ გამოვიკვლევთ ფსკერს ჩქერიდან 50 მეტრით ქვემოთ და ზემოთ. შეიძლება ძალიან კარგი სათევზაო ადგილი ვიპოვოთ.
ციცაბო ნაპირი
იქ, სადაც ციცაბო ნპირი წყალს ებჯინება, პერიოდულად ხდება გრუნტის ჩამოშლა და ვარდნა მდინარეში. დროთა განმავლობაში ასეთი ჩამოშლის ადგილებში წყალქვეშ ფსკერზე იქმნება სხვადასხვა სიდიდის ამოზნექილობები და "მიკროჩქერები". თუ ციცაბო ნაპირი განლაგებულია მდინარის მოსახვევში და არა სწორ მონაკვეთზე, ასეთი წყალქვეშა ბორცვაკები მიმართულებას უცვლიან დინებას და ხშირად წარმოქმნიან წყლის ნაკადს, რომელსაც დინების საწინააღმდეგო მიმართულება აქვს, ანუ აქ ხდება წყლის ერთგვარი ბრუნვა.
წყლის ასეთი ბრუნვის ადგილებში წყლიდან ილექება და ფსკერზე გროვდება საკვები, შესაბამისად, აქ თევზიც ბევრი იქნება. მაგრამ, მონტაჟის ჩაგდება უშუალოდ წყლის ბრუნვაში შეიძლება ხშირად სადავეს გადახლათვით დასრულდეს. ამიტომ, ანკესს ვტყორცნით სწორი და საპირისპირო დენებების გამყოფი ზოლიდან ოდნავ ქვემოთ.
თუ ქარიან ამინდში მდინარის ზედაპირს კარგად დავაკვირდებით, ზოგიერთ ადგილას შეიძლება შევამჩნიოთ, რომ მდინარეს გლუვ ზედაპირზე ჩნდება გარკვეული ხორკლიანობა, რომელიც თავისებურ ზოლებს წარმოქმნის დინების გასწვრივ.
როგორც წესი, ასეთ ადგილებში განლაგებულია ფსკერული ჩეღრმავებები. აქაც, რა თქმა უნდა თევზის თავმოყრის ადგილი იქნება.
მოკლედ, თუ ვიზუალურად ჩვენთვის საინტერესო ადგილი უკვე ვიპოვეთ, შეგვიძლია აქვე გავჩერდეთ და დავიწყოთ აღჭურვილობის გაშლა.
სტატია მოამზადა თენგო ბინიაშვილმა
