ვობლერი
ვობლერი (wobbler) - პლასტიკისგან ან ხისგან დამზადებული სატყუარა სპინინგით თევზაობისთვის. როგორც წესი ვობლერი თავისი ფორმით იმიტირებს თევზს ან მწერს, მისი შეფერილობა არის როგორც რეალისტური ასევე არარეალისტურიც. ვობლერზე დამონტაჟებულია ერთი, ორი ან სამი სამკავა. მის წინა ნაწილში განლაგებულია ჩასაღრმავებელი პლასტიკის ან რკინის "ნიჩაბი". ძუის გამოსაბმელი რგოლი შეიძლება იყოს როგორც ვობლერის წინა ნაწილზე, აგრეთვე "ნიჩაბზეც". ვობლერებში განასხვავებენ მცურავ, მყვინთავ და ნეიტრალურ (სუსპენდერ) მოდელებს.
ვობლერი როგორც სატყუარა სავარაუდოდ არსებობს უკვე ძალიან დიდი ხანია, მაგრამ ფართე გავრცელება და პოპულარობა მან მოიპოვა ფინელი მეთევზის ლაური რაპალას მეშვეობით, რომელმაც მყარი ხის ჯიშისგან გამოჭრა თავისი პირველი სატყუარა. მოგვიანებით მან დაარსა ფირმა Rapala, რომელიც დღეს-დღეობით მსოფლიო ლიდერია ვობლერების წარმოებაში.
სპინინგის სატყუარათა წამყვანი მწარმოებლები გვთავაზობენ ვობლერების ფართო არჩევანს, თანაც ყოველივე მოდელი რამოდენიმე ზომითაა წარმოდგენილი. რომელი ვობლერი ავირჩიოთ და რა შემთხვევაში? სავარაუდოდ ინფორმაციის ნაკლებობა ხელს უშლის დამწყებ სპინინგისტს გაერკვეს ვობლერების ამ მრავალფეროვნებაში და წარმატებით ითევზაოს მათზე, ვობლერი ხომ ყოველთვის იჭერს თევზს იმ შემთხვევის გარდა თუ მას კოლოფიდან არ ამოვიღებ
ამ სტატიაში მე არ მოვახდენ ვობლერების კლასიფიკაციას, მე მინდა გაგიზიაროთ გამოცდილება თუ როგორ ავირჩიოთ ვობლერი კონკრეტულ სათევზაო ადგილისთვის. ბევრი მეთევზე ვობლერს ყიდულობს პრინციპით-ეს ქარიყლაპიაზეა, -ეს ქორჭილაზე, -ეს ქაშაპზე... და ამავე დროს სრულიად არ ითვალისწინებენ მომავალი თევზაობის პირობებს: წყლის სიღრმეს, დინების სიჩქარეს, ბალახიანობას და სხვა.
სხვადასხვა ფირმების ვობლერების- Rapala (ფინეთი), Ugly Duckling (სლოვენია), Duel (იაპონია), Yo-Zuri (იაპონია), Daiwa (იაპონია), Rebel (აშშ), Cotton Cordell (აშშ) Salmo (პოლონეთი)- კოლოფებზე ხშირად ნახავთ წარწერას "Shad" ან "Minnow". ამ ტიპის ვობლერებს როგორც წესი წინა ნაწილი უფრო სქელი აქვთ და კუდისკენ თხელდებიან, მათი ჩამაღრმავებელი "ნიჩაბი" სხვადასხვა ზომის და დახრილობისაა, საუკეთესო მოდელები ძლიერ დინებაზე თევზაობისას არ ტრიალდებიან და უჭირავთ ჭერისთვის საჭირო ჰორიზონტი.
"Shad"
ამ ოჯახის ვობლერებს იყენებენ ღრმა, შესაძლებლობისდაგვარად უდაბრკოლებო ადგილებში სათევზაოდ, მაგრამ თუ ჭერის სიღრმე აღემატება 6 მეტრს მაშინ "Shad" ტიპის ვობლერი უკვე ნაკლებად გამოსადეგარია. საქართველოში სამწუხაროდ თითქმის არავინ თევზაობს ტროლინგით (მატორიანი ნავით ვობლერის ბუქსირებით თევზაობა), ეს ვობლერები ყველაზე კარგ შედეგებს სწორედ ამ მეთოდით თევზაობისას აჩვენებენ, მაგრამ ჩვენ პირობებშიც, ნაპირიდან თევზაობისას, "Shad" ტიპის ვობლერები მშვენივრად იჭერენ სიღრმეში ჩასაფრებულ ქარიყლაპიას, ლოქოს, ქორჭილას. კარგ შედეგებს გვაჩვენებენ ამ ტიპის ვობლერები ზღვის მტაცებლების ჭერის დოსაც.
"Minnow"
ამ ოჯახის ვობლერებს კიდე ეძახიან "stick", მათი მოგრძო და ვიწრო ფორმის გამო . "Minnow"-ს დამახასიათებელი თვისებაა მრავალფეროვანი თამაში (ვიბრაცია) გატარების დროს. თუ ამ ტიპის ვობლერს ვიწრო და მოკლე "ნიჩაბი" აქვს, მაშინ იგი ხშირ და აქტიურ თამაშს აკეთებს გატარებისას, დინებაზე ესეთი ვიბრაცია პროვოცირებს კალმახის, ქაშაპის, ჭანარის თავდასხმას. ზღვაში კი სარგანის, ლიფორის და სტავრიდის. თუ "ნიჩაბი" ფართე და დიდია ასეთი ვობლერები უფრო მონოტონურ და გაშლილ ვიბრაციას ახდენენ, რაც მშვენივრად მუშაობს მდგარ წყალზე და იზიდავს პირველ რიგში იმ თევზებს, რომელთა პირის აპარატი ვიწრო თევზის საჭმელადაა შექმნილი, ასეთებია ფარგა, ჭერეხი, ქორჭილა.
იმიტაციები --Cicada
ვობლერების ცალკე კატეგორიას წარმოადგენენ იმიტაციები (მწერების, ბაყაყების, კიბორჩხალების და სხვა). ამ ტიპის ვობლერებს ძირითადად აწარმოებენ ამერიკული და იაპონური ფირმები და მათ როგორც წესი მოყვებათ ინსტრუქცია, რომლის გაცნობასაც მე აუცილებლათ გირჩევთ. იმიტაციებით საქართველოში შეგვიძლია დავიჭიროთ ქაშაპი, ქორჭილა, ჭანარი, ქარიყლაპია, ჭერეხი. რაც უნდა გვახსოვდეს იმიტაციის ტიპის ვობლერებზე თევზაობისას ეს არის ის, რომ კალია მარტში თითქმის არ არის, კიბორჩხალა ყველა წყალსატევში არ ცხოვრობს, ანუ შესაბამის სეზონში და შესაბამის ადგილზე შესაბამისი ვობლერი უნდა გამოვიყენოთ.
ზედაპირული ვობლერები -- Stick Bait და Popper
ამ ტიპის ვობლერები გამოიყენება მდგარ წყალზე, სიღრმეზე არაუმეტეს ორი მეტრისა და როგორც წესი წყალმცენარეებით სავსე წყალსატევებზე. პოპპერები, სტიქ ბეითები, პროფბეიტები, კრენკები.. ეს სულ ზედაპირული ვობლერებია, მატი გამაერთიანებელი პრინციპი ისაა, რომ გატარებისას ყველა გამოსცემს სპეციფიკურ ხმას, რომელიც შორი მანძილიდან იზიდავს მტაცებელს. საქართველოში ამ სატყუარით თქვენ პირველ რიგში დაიჭერთ ქარიყლაპიას. ზღვაში კი ლიფორს.
გარდა ზემოთ აღწერილი ვობლერებისა არსებობს რა თქმა უნდა სხვა უამრავი მოდელიც, დროთა განმავლობაში დარწმუნებული ვარ თქვენ მათაც აითვისებთ და არა ერთ წარმატებულ თევზაობას გაატარებთ!
სტატია მოგვაწოდა ჟურნალმა "ნადირობა და თევზაობა", სტატიის ავტორი შოთა კვარაცხელია
დანარჩენი თქვენ დაამატეთ ძვირფასო სპინინგისტებო 
